追月深圳遊 - 笋崗傢俬城

細佬一直都好想上深圳睇吓啲傢俬係唔係人哋講咁平靚正, 就陳追月日公眾假期上去睇睇.........

由於深圳好多地方都有傢俬賣, 今次先行笋崗, 由萬象城對面陽光醫院對出 "寶安南路站" 坐巴士去 "深圳人才市場站" 下車就到.

落車過對面就見到好幾座傢俬城.....

先行好百年, 全座的傢俬都好名貴, 這個床架要5萬幾人民幣, 中國真係富起來, 間房可以方得落咁大張床(香港無可能), 仲賣到咁貴!!!!!!

傢俬廣場竟然有人現場彈奏三角琴...........可想而知賣得起這裡的傢俬應該都好有品味.........

行咗兩層太貴! 過隔離幾座, 每座都唔同特色, 有平有貴, 最特別係好多歐洲宮殿式傢俬, 好靚........最適合係別墅式大屋, 可惜唔比影相!!!!!!   行咗個幾兩鐘發覺貴的可以好靚, 平的同香港 DSC 差不多, 買現盛又唔係買得多就無必要專程上黎買..........

跟住行過兩條街去 B&Q

又行咗盛個鐘.......之後坐的士反之前落巴士的地方行工藝品中心同文具批發, 行咗一陣就坐的士去少年宮個書城行吓, 由於放工時間比較塞車, 坐咗25蚊先到.  

行完就坐地鐵去科學館站食飯, 今晚去食新疆菜.